Та Америкийн зохиолч, сэтгэл судлаач Луйз Л Хэй (Louise L Hay)-ийн "Та өөрөө өөрийнхөө амьдралыг эрүүлжүүлж чадна" гэдэг номыг уншсан уу?

Ц,Одонтуяа гэдэг бүсгүй энэ номыг англи хэлнээс орчуулсан юм байна лээ. Би 2007 онд анх уншиж байсан. Ер нь иймэрхүү номыг ширээний ном болгоод байнга л уншиж  сэргээж байхгүй бол мартчихаад байх юм. Тухайн номоос хүн байнга өөдрөг, эерэг бодол бодож, өнгөрснийг уучилж, ирээдүйд итгэх нь амьдралаа эрүүлжүүлж анагаах, сэтгэлээ ариусгах хамгийн оновчтой арга юм гэдгийг ухаарсан.

Энэ ном "Нью-Йорк Таймс" сэтгүүлийн шилдэг борлуулалттай номын жагсаалтын тэргүүн байранд 12 долоо хоногийн турш дараалан бичигдэж, дэлхийн 25 хэлээр хэвлэгдэн 30 гаруй сая хувиар борлогдсон дэлхийн олон хүмүүст таалагдсан сайн ном бололтой. Надад ч гэсэн маш их таалагдсан.

Энэ номыг зохиогч хатагтай Луйз Л Хэй  хэдийгээр бага насандаа хүнд хэцүү амьдралыг туулсан ч гэсэн өөрийн баримталдаг амьдралын эерэг философи, эрүүлжүүлэх техникийн ачаар энэ бүхнийг даван туулж аз жаргалтай амьдралыг цогцлуулж чадсан гайхалтай эмэгтэй юм байна лээ.

Тэр байтугай ямар ч мэс засал хийлгэлгүйгээр оюун санааны болон сэтгэл зүйн олон төрлийн эмчилгээний дүнд өөрийн савны хорт хавдрыг оношлогдсоноос хойш 6 сарын дараа ямар ч ул мөргүй болтол нь арилгаж чаджээ.

Энэ эмэгтэй 27 ном бичсэн төдийгүй хүмүүсийн урилгаар очиж лекц уншиж зөвлөгөө өгөх, сургалт явуулах зэргээр өөрийн амьдралд тохиолдсон туршлага, сургамжаа бусадтай харамгүй хуваалцаж, мэдэхгүй шалтгаанаар сэтгэлийн зовлонд унаж, биеэ өвчлүүлэх байсан зуу зуун хүнийг өвдөхөөс нь урьдчилан сэргийлж, "энэ өвчин эдгэхгүй дээ" гэж цөхөрч эхэлж байсан мянга мянган хүнд сэтгэлийн тэнхээ, итгэлийн хүчээр эрүүлжүүлэхэд нь тусалж, "амьдрал гэдэг хэцүү юм, хүн гэдэг өөдгүй юм, ирээдүй гэдэг таахад хэцүү бүрхэг юм, тулгарсан бэрхшээл давагдашгүй хүнд юм" гэж сөхөрч, итгэлийн галаа бөхөөх шахсан сая сая хүнд оюуны гэрэл гэгээ, өөдрөг итгэл, хүсэл тэмүүлэл, ухаарал хайрласан буянтай хүн.

Луйз Л Хэйгийн философийн зарчмууд

• Бид туулж өнгөрүүлсэн амьдралынхаа туршлага, сургамж, алдаа, онооны хариуцлагыг өөрсдөө л хүлээх ёстой.
• Бидний бодсон бодол болгон бидний ирээдүйг бий болгодог.
• Хүч чадлын амин сүнс Одоо цагт оршин байдаг.
• Өөрийгөө буруутгаж, өөртөө гэмших нь хүн бүхнийг зовлонд унагадаг.
• Хүн бүхний боддог хамгийн нийтлэг дүгнэлт бол "би тийм ч сайн хүн биш" гэсэн санаа. Энэ бол зөвхөн бодол. Бодлыг өөрчилж болно.
• Гомдол, бухимдал, дургүйцэл, шүүмжлэл, гэмшил гэдэг бол хамгийн хөнөөлтэй зүйлс.
• Гомдол бухимдлаа арилгаж чадсанаар хорт хавдрыг ч эдгээж чадна.
• Хэрэв бид өөрийгөө хайрлаж чадах юм бол амьдралд бүх зүйл сайн сайхан болно.
• Бид өнгөрснийг уучилж, хүн бүрийг өршөөх ёстой.
• Бид өөрсдийгөө хайрлаж сурахад бэлэн байх ёстой.
• Өнөөдрийн амьдралаа хүлээн зөвшөөрч, өөрийгөө хайрлаж, өөртөө талархаж сурах нь ирээдүйн эерэг өөрчлөлтийн гол түлхүүр юм.
• Бид өвчин гэж нэрлэгддэг хэрэггүй зүйлсийг өөрсдөө л бий болгодог.

Эд баялаг, хөрөнгө мөнгөөр хангалуун байлаа ч сэтгэл эзгүйрч, санаа зовох зүйл бишгүй тохиолддог. Байхгүйн зовлон, бий болгохын зовлон, байгаагаа арвижуулахын зовлонд амьдралаа, сэтгэл санаагаа тушаачихаад байгаа өнөө цагт бидэнд өөр анхаарах ёстой, үнэ цэнэтэй зүйл байдаг юм гэдгийг энэ ном ойлгуулах болно.
Энэ номыг уншсанаараа Та уужирч тайвшран, өөрийгөө, бусдыг, амьдралыг илүү сайн ойлгож, хүмүүсийг хайрлан, өөртөө итгэж, өнгөрсөнөө уучилж, өнөөдрөө зөвшөөрч, ирээдүйг талархан угтаж, өөрийнхөө дотор байгаа "өөрийгөө"олоход тань тусалж амьдралд тань цоо шинэ өөрчлөлт авчрах болно гэж найдаж байна.