Хэрэв та ажлын өрөөгөө эсвэл гэртээ их цэвэрлэгээ хийхдээ өрөөнд байгаа бүх зүйлийг нэгбүрчлэн үздэг. Өөрийнхөө хайртай дуртай, зарим зүйлээ арчиж зүлгэн улам өнгөлөг сайхан болгож буцааж тавина. Харин зарим зүйлсийг засаж сайжруулах хэрэгтэй гэдгээ анзаарч авна. Гэтэл зарим зүйлс дахин хэрэглэгдэхээргүй хуучирч муудсан, эсвэл огт хэрэгцээгүй болсон байх тул хаях хэрэгтэй болдог. Хуучин сонин сэтгүүл, хагарсан аяга шаазанг хогийн саванд хийхээс өөр аргагүй.

Тэдгээр хэрэгцээгүй зүйлссийг хаяхдаа бид хэзээ ч харамсаж халагладаггүй. Хэрэггүй зүйлсээ хаяж, гэр орноо цэвэрлэхэд юунд нь уурлах билээ.

Энэ бол оюун бодлоо цэнэж, сэтгэл санаагаа ариусгахад ч ижилхэн үйлчлэх хууль. Бодол санаанаасаа аль хэдийн үлдэн хөөх ёстой хуучин итгэлүүдийг гаргаж хаяхад уурлах хэрэг байхгүй.

Та ингэхэд өнөөдрийнхөө хоолыг өчигдрийн хаясан үлдэгдлээсээ ухаж, өвдөл цөвдлийг нь ашиглаж бэлддэггүй биз дээ?

Түүнтэй адил маргаашийн амьдралаа өчигдрийн гунигтай дурсамж, төөрсөн итгэлээрээ бүтээхийг хүсэхгүй байгаа биз дээ?

Хэрэв ямар нэгэн бодол, итгэл танд хэрэг болохоо нэгэнт больсон бол түүнийг орхи!

Нэг итгэсэн бол түүнд үүрд итгэх ёстой гэж бичсэн ямар ч хууль хаана ч байхгүй.

Дасгал

Цагаан цаас аваад түүн дээр ээж, аавынхаа "буруу" гэж хэлдэг байсан зүйлсийг жагсаан бичих. Ямар ямар сөрөг мэдээллүүдийг бид сонсдог байж вэ? Аль болох олныг санах хугацаа өөртөө гарга. Үүнийг хийхэд хагас цаг тохиромжтой байдаг юм. Жишээ нь: Тэд мөнгөний талаар юу гэж хэлдэг байсан бэ? Чиний бие галбирын талаар? Хайр сэтгэл, үерхэл нөхөрлөлийн талаар? Чиний авьяасын тухайд? Чамд хэлдэг байсан тэдний үгэнд ямар сөрөг мэдээлэл агуулагдаж байсан бэ? Тэдгээрийг бичсэний дараа тэр жагсаалт руу харж байгаад " Миний итгэл эндээс л төржээ" гэж хэлээрэй. Дараа нь өөр нэгэн хуудас цаас аваад арай гүнзгийрүүлэн бичье. Өөр хэнээс сөрөг мэдээлэл, сөрөг санаа сонсож байсан бэ? Хамаатнууд, багш нар, найзууд, удирдлага, сүмийнхнээсээ ... гэх мэтчилэн бүгдийг бич. Энэ хоёр хуудсыг хараад та далд ухамсраасаа, толгойноосоо авч хаях бодол, төөрөгдлүүд бичээстэй байгааг олж харах болно.

Луйз Л Хэй "Та өөрөө өөрийгөө эрүүлжүүлж чадна" номоос