Уурласан хүн гэдэг амьтны баг толгойдоо углачихаад өрөөний буланд сууж байгаа хүүхэд шиг санагддаг. Ямар нэгэн юм болоход уурлана, дахиад өөр асуудал гарахад дахиад л уурлана. Энэ нь үргэлжилсэн хэвээр, та ч уурлахгүй байж чадахгүй. Ингээд ямар ашиг гарах вэ? Зөвхөн уурлаж энергээ гарздана гэдэг ямар тэнэг хэрэг вэ? Энэ нь бас амьдралыг шинээр, өөрөөр ойлгоход саад болдог. Түүний оронд өөрөөсөө:

Уур хүрээд байгаагийн шалтгаан юу байна вэ?

Таныг хүмүүс уурлуулах ямар ааш авир таньд байна?

Тэдний тийм ааш авир гаргах шалтгаан нь танаас үүдсэн биш үү?

Та тэр бэрхшээлээс гарахын тулд яагаад уурлах нь зөв гэж бодсон бэ?

гэсэн асуултуудыг асууж хариуг нь олохыг хичээ дээ.

"Өөд нь шидсэн чулуу өөрийн толгой дээр" гэгчээр та хүнд яаж хандана, тэд танд тэгж хандана. Та хүнд юу өгнө, тэр танд тийм зүйлийг хариу барина. Бусдын уурыг хэр хүргэнэ, та тийм л хэмжээгээр уурлах болно. 

Энэ үгнүүд таны уурыг хүргэж байна уу? Сайн байна. Тэгвэл та өөрчлөгдөхөд бэлэн байна, өөрчлөгдөх шаардлагатай болжээ гэсэн үг.

Өөрийнхөө ууртай занг өөрчлөх хэцүү байдаг. Яагаад би гэж? тэд л өөрчлөгдөх ёстой гэж боддог. Өөрчлөлтөө өөрийнхөө дотоод өөрчлөлтөөс буюу бодол санаа, итгэл үнэмшил,өөрийгөө илэрхийлэх, үг яриагаа эхлээд өөрчлөх хэрэгтэй. Ингэсний дараа гадаад өөрчлөлт аяндаа бий болно.

Ямар нэгэн өөрчлөлт хийхийн өмнө хэдий чинээ бодол санаа төвлөрч, зөвшөөрч өгөхгүй эсэргүүцэх тусам энэ өөрчлөлт төдий чинээ чухал гэсэн үг.

Надад өөрчлөх ёстой зүйл байгаа болохоос биш би тэр чигээрээ муу хүн биш гэдэгтээ итгэдэг.

Оюун бодлоо цэгцэлнэ гэдэг нэг талаараа гэр цэвэрлэхтэй ижилхэн зүйл. Би оюун бодлоороо аялж, тэнд ямар итгэл, ямар бодол байна вэ гэдгийг шинждэг. Зарим хайрламаар бодлоо арчиж, зүлгэн улам өнгөлөг өөдрөг болгоно, засаж залруулах шаардлагатай хэсгийг нь аль болох чадлаараа засаж өөрчлөнө. Зарим нь өчигдөр, уржигдрын сонин шиг хэрэгцээгүй, хов жив дүүрэн, хаяхаас өөр аргагүй болсоныг нь харамсаж хорогдолгүйгээр хогийн саванд хийж үүрд өөрөөсөө холдуулдаг.

Амьдралын туршид бодож заншсан бүтэлгүй, идэвхгүй, сөрөг бодлоосоо салж, оюун архиа цэвэрлэнэ гэдэг удаан хугацааны туршид өөх тостой , хүнд хоолоор биеэ хордуулж байснаа цэвэрлэж зөв хооллож сурахтай яг ижил зүйл юм.

Сөрөг бодол, буруу хооллолт аль аль нь биеийн эрүүл мэндийг хямраадаг. Хоолны дэглэм барьж эхэлмэгц биед хуримтлагдсан хорт зүйл гадагшилж эхний нэг хоёр хоног гэдэс дотор эвгүйрхдэг шиг оюун санаагаа цэвэрлэж, бодол итгэлээ цэгцлэх өөрчлөлтийн эхний үед бага зэрэг хэцүү санагдаж, сэтгэл хямарч болно.

Талархлын баяраар таваг дүүрэн цацагт хяруулын мах чанаж, харин түүнийг идэж дуусмагц тавгаа цэвэрлэдгийг сана даа. Хайруулын тавагны тостой ёроол, махны наалдсан үлдэгдлийг цэвэрлэхийн тулд халуун ус, саван хийж хэсэг дэвтээдэг шүү дээ. Дараа нь ёроолыг нь хусна. Тийм бохир шавхрууг тэр хэвээр нь үлдээвэл үнэхээр заваан юм болно. Харин дэвтсэн даруйд нь хусаж цэвэрлэвэл шинэ юм шиг өнгө орно.

Яг үүн шиг бодол санаанд тогтож, бэхэжсэн хуучин хэрэггүй бодол, итгэл, төөрөгдлиийг цэвэрлэх гэдэг амар ажил биш. Түүнийг шинэ санаагаар дэвтээж, хуучин зүйлийг дээш хөвөн гарч иртэл шинэ, өөдрөг хэллэгүүдийг дахин дахин давтан хэлснээр хуучин бодол, сэтгэлийн түгжээ чинь арилах болно.

Луйз Л Хэй "Та өөрөө өөрийнхөө амьдралыг эрүүлжүүлж чадна" номоос