Биднийг бага байхад компьютер тоглоом гэж байсангүй. Хүүхдүүд сагс, теннис, дээс, резин, матак тоглодог байлаа. Спорт заал цөөхөн тул аймгийн нийгэмлэгийн зааланд анги ангиараа ирж оочирлон сагс, теннис тоглодог байв. Хэн түрүүлж ирсэн нь түрүүлж тоглодог бичигдээгүй хуультай. Гэвч сургуулиудийн хичээл зэрэг тарах тул хэн нь түрүүлж ирснийг тогтоох боломжгүй үед заалны манаач өвөө 3-аас шидүүлж түрүүлж гоол хийсэн 2 багийг тоглуулдаг шударга зарчимтай байлаа, хэхэхэ. Нэг хүүхэд нэг төгрөгөөр нэг цаг сагс тоглодог. Нэг удаа 10-аас дээш хүүхэд заримдаа 20 шахуу хүүхэд тоглодог байсан байх өө. Харин ширээний теннисийг гурван төгрөгөөр бүтэн нэг цаг хэдэн ч хүүхэд тоглож болдог байсан юм. Сагс тоглох цагаа хүлээх зуур теннис тоглох нь олонтоо. Би 4-5-р ангид байх үеэсээ ширээний теннис тоглож эхэлсэн юм уу даа. Мэргэжлийн багш зааж өгөөгүй өөрөө хар аяндаа сурсан болохоор цохиурын барилт, бөмбөгний авалт энэ тэр шал буруу сурсоон. Дунд болон дээд сургуульд сурч байх үедээ ширээний теннисээр тэгтлээ их тоглож байсангүй. Харин дээд сургуулиа төгсөөд ажиллаж эхэлсэн үеэс ширээний теннисийг хорхойсон тоглож эхэлсэн юм даа. Манай ажлынхан ширээний теннис тоглох дуртай, сайн ч тоглодог, 2 инженер залуу бүр улсын зэрэг цолтой тамирчид байлаа.

Цайны цаг болонгуут ажилчдын гуанзанд хамгийн түрүүнд орж өдрийн хоолоо хурдхан идчихээд тоглож гарна даа. Тоглох цаг бага, ширээ ганцхан, тоглох хүсэлтэй хүн олон тул богино хугацаанд олон хүн тоглох боломжтойг бодож хос тоглолт хийдэг байлаа. Хүчээ тэнцүүлээд сайн тоглодогийгоо маруухан тоглодогтойгоо нэг баг болгоод тоглож гарна аа. Хос тоглолт хөгжилтэй, сонирхолтой байдаг юм.

Яг л тэмцээний журмаар оноог тоолж, багууд давуулалтаа ээлжээр хийж, тоглогчид ээлжлэн байраа сольж тоглодог байв. Тоглох дуртай хорхойтнууд нийлээд цохиур, бөмбөг, тороо авчихна аа. Тэр үед одооны залуус РС тоглоомд донтдог шиг теннист донтдог байлаа. Ажил тараад гэртээ харихгүй орой болтол тоглоод л, амралтын өдрүүдээрээ байгууллагыхаа спорт зааланд байнга тоглоод л.

Би ази барилтаар цохиураа барьдаг болохоор зүүн талын тоглолт их муутай, ер нь л муухан тоглодог байсан. Сайн тоглодог хүмүүстэй байнга тоглоод байхаар тухайн хүний хувийн тоглолт их сайжирч туршлагаждаг юм байна лээ. Ямар ч бөмбөгөнд хүрдэг, эргүүлэгтэй ирсэн бөмбөгийг авч чаддаг болж ширүүн довтолсон бөмбөгийг хааяадаа бас авчихдаг, эсрэг тоглогчийнхоо сул талыг ашигладаг, хууралтыг сайн хийдэг, баруун талд өндөрхөн ирсэн бөмбөгийг хүчтэй цохиж довтолж чаддаг болтлоо өсөж билээ. Даанч  хачин сайхан өөрийн гэсэн эргэлттэй давуулалт хийж сураагүй юм даа. Тэр байтугай давуулалт хийхдээ бөмбөгөө гараасаа салгаагүй гэж тэмцээний явцад хэд хэдэн удаа бөмбөгөө хураалгаж байлаа. Уул нь ингээд л бөмбөгөө гараасаа салгах ёстой байхгүй юу.

Хүний сурсан юм хэзээ ч хэрэг болдог юм байна лээ. Өөр газар ажилд орлоо. Байгууллагууд жил бүр спортын түгээмэл төрлүүдээр аваргаар тодруулдаг нь нийтлэг уламжлал. Тэгсэн миний аз таарч байгууллагын эмэгтэйчүүдийн "ширээний теннисний аварга" болчихдог юм байна. Олон ажиллагсадтай, олон салбартай байгууллагад аварга болно гэдэг нэр хүндийн хэрэг шүү,ккк.

Энэ явдлаас хойш нэг жилийн дараа ангийн багш хөдөөнөөс ирж, Улаанбаатарт байдаг 10 жилийн ангийнхан маань уулзаж теннис тоглоцгоов. Зааа том байгуллагын аваргатай үзэлцэнэ ээ гээд л надтай тоглолоо. Хэхэхэхэ, би яахав дээ, навс хожигдож байгаа юм чинь,ккк. Гэхдээ нэгэнт болсон аваргыг дараа нь хожигдлоо гээд яах юм, тиймээ. Аварга хэвээрээ л байх юм чинь, хахаха.

Теннис ч сайхан спорт шүү. 1 цаг теннис тоглох нь хэдэн км гүйсэнтэй тэнцдэг юм бол доо? Нэлээд их байх шүү. Теннис тоглолгүй зөндөө удчихжээ. Нээх сайхан тоглох юмсан.