Саяхан инээхүү дээрээс "Төгс эхнэр" гэдэг оросын нэг кино үзлээ. Хөөрхөн кино юм өөө.

Нэг залуу хосын амьдрал гарч байна аа. Эхнэр нь дуулах сонирхолтой байсан боловч нөхөр нь түүнийг ня-бо-гийн ажилд оруулчихсан. Хоёул амьдралын төлөө өглөөнөөс орой болтол ажиллацгаана. Орой гэртээ сульдаж ядарсан хүмүүс ирэхэд хоосон хөргөгч, хөндий байр угтана. Нэгэнт хэтэрхий орой болсон болохоор хоол хийгээд байх цаг ч байхгүй, чадал ч байхгүй. Бэлэн хоолоор аргацаана. Нөхөр эхнэртээ бухимдаж эрт ирж хоол ундаа хийхэд яадаг юм бэ? Чамгүйгээр танай байгууллага сүйрэх гээд байна уу? Ерөнхий ня-бо ч биш нэг муу тооцооны ня-бо байж гэхчлэн уурлах юм. Орой боллоо. Эхнэр усанд орж анхилуун үнэр үнэртүүлэн толины өмнө нимгэн хөнгөн хувцастай эргэлдэхүйд залуугийн сэтгэл хөвсөлзөн өөрийн эрхгүй эхнэрийн зүг тэмүүлэх боловч өмнөхөн нь элдвээр хэлүүлсэн бүсгүй мөчөөгөө өгөхгүй "муу тооцооны ня-бо бас ядардаг юм шүү, уучлаарай" гэж хэлэн залуугийн хүсэл сонирхлыг үл хайхран буруу харан унтаад өгнө өөө, хэхэхэ.

Маргааш нь залуу ажил дээрээ нэг л урвагар, амьдрал нь ямар ч утгагүй мэт санагдана. Орой болжээ. Залуу гэртээ харих гээд явж байтал цас малгайлан орж зам битүү бөглөрчээ. Залуу ядарсандаа жолооны ард нойронд эрхгүй дийлэгдлээ.

Залуу 3 эхнэртэй болчихжээ. Ив ижилхэн зүс царайтай, ихэр 3 эхнэр. Гаднаас нь хараад хүн ялгахын аргагүй. Гэвч зан ааш огт өөр.

Нэг дэхь эхнэр - Ажил хэрэгч эхнэр. Бизнес ярин орой үдэш хэрэгтэй бол ажил хэргийн уулзалтанд гараад явах нь энүүхэнд. Түүнд эмэгтэй хүний ялдам ааш, наалинхай зан байхгүй. Тэр зөвхөн ажил л боддог эмэгтэй. Гэхдээ нөхөртөө анхаарал тавин бэлэг бэлэглэчихдэг.

Хоёрдахь эхнэр- Сайн, халамжтай гэрийн эзэгтэй. Хоол унд, боов талхыг янз янзаар нь хийж ширээгээ үргэлж амттай хоол цайгаар дүүргэнэ. Эр нөхөртөө хүссэн хоол ундыг нь хийж өгнө, хувцас хунарыг нь цэмцийтэл угааж цэвэрлэнэ. Гэвч түүнд амьдралын өөр зорилго үгүй. Сонирхож үздэг кино нь ТВ-ээр өдөрт гардаг савангийн дууриуд. Нөхөр түүнтэй ярилцах ямар ч сонирхолгүй.

Гуравдахь эхнэр- Мөнгө үрэмтгий, нэрд гарч яваа дуучин бүсгүй. Өөрийнхөө дуртай ажлыг хийж яваа аз жаргалтай нэгэн. Наалинхай, эмэгтэйлэг, эр нөхрөөсөө мөнгийг эвтэйхэн салгаж дөнгөнө. Сексийн ажилдаа санаачлагатай, шинийг эрэлхийлдэг бүсгүй.

Төгс эхнэр байхын тулд хүүхнүүд бид чинь 3-4 хүний рольд тоглох хэрэгтэй байдаг юм байна аа, хэхэхэ.

Мөнгө сайн олдог мундаг бизнесмэн, хоол ундыг төрөл төрлөөр нь амт, чанар, өнгө үзэмжтэй сайн хийдэг мэргэжлийн тогооч,нөхрөө хайр халамжаар дутаахгүй хувцас хунарыг нь угааж цэвэрлэж индүүдэж өгдөг сайн эхнэр, ор хөнжилдөө эр нөхрийнхөө хүсэл тачаалыг сайн хангадаг порно од байх шаардлага тулгардагийг анзаарсан биз дээ?

Зүүдлээд сэрсний дараа залуу амьдралын утга учрыг сая л нэг ойлгох шиг. Тэр хоёр хосын амьдрал аз жаргалтай, утга учиртай болж байгаагаар кино төгсөж байна лээ.

Киноноос авах сургамж:

Эрэгтэйчүүд, нөхрүүдэд: Эхнэртээ, найз бүсгүйдээ "төгс" байх шаардлага бүү тавь. Тэр хувь хүн. Эцсийн эцэст чамд хайртай, та хоёр хамт байснаараа аз жаргалтай л байж чадаж байвал бусад бүх зүйлийг шийдвэрлэж болно ооо.

Эхнэрүүдэд, хүүхнүүдэд, бүсгүйчүүдэд: Гэхдээ бүсгүйчүүд бид чинь "төгс" байхын төлөө тэмцэх хэрэгтэй шүү, тийм үү? 100% биш юм аа гэхэд 70-80% төгс рүү тэмүүлэх ёстой байх гэж би бодож байна.