Сайн байна уу, ээж ээ? Сайхан намаржиж байна уу?

Өдөр бүр шахуу л утсаар ярьдаг байж энэ хүүхэд яачихаав гэж гайхаж байна уу?

Ээж ээ! Өнөөдөр ямар өдөр бил ээ? Бага охиных нь төрсөн өдөр шүү дээ. Та намайг бага байхад миний төрсөн өдрийг дандаа мартдаг байж билээ. Түүн шигээ бас мартчихсан уу, хэхэхэхэ. За за тоглосон юм өөө. Миний сайхан ээж мартаагүй байгааг охин нь мэдэж байна аа.

Миний төрсөн өдөр өө гэдэг чинь таны ч гэсэн баярын өдөр шүү дээ. Гэвч үнэндээ урьд өмнө нь би өөрөө л найз нөхөдтэйгөө эсвэл нөхөр, хүүхдүүдтэйгээ төрсөн өдрөө тэмдэглэдэг байснаас ижий таньдаа баяр хүргэж байснаа санахгүй байх юм. Муу охин юм даа, би.

Нээрээ та намайг төрөхөд бас дахиад л охин гээд сэтгэл дундуур байсан уу,ккк. Аав та хоёр юу ч ярьж байгаагүй л дээ, би зүгээр л саваагүйрхэж өнөөдөр гэнэт тэгэж бодоод, хэхэхэ. 2 охинтой байсан болохоор 3 дахь хүүхдээ хүү байх гэж горьдсон болов уу л гэж...

Ээж ээ, охидуудтай байх сайхан байгаа биз дээ? Нарийн ширийнээ ярилцаад сууж байхад.

Ээж ээ, танаасаа хол ирчихээд бодож суухнээ аав, ээжийгээ сайн асарч өргөж байгаагүй л хүн юм байна даа гэж би өөрийгөө дүгнээд. Арваад хоногтоо нэг, заримдаа сардаа нэг очиж уулзахдаа хүндэт зочин шиг танаар баахан хоол цай хийлгүүлж бөөн ажил удаж, дайлуулж дайлуулж аваад явдаг байж билээ.

Одоо охин нь бага багаар ухаарч байна. Ижийдээ очоод хөлийг нь, үсийг нь угааж өгч байя, усанд оруулж өгч байя, бууз, банш хийж бэлдэж өгч байя, хувцас хунарыг нь угааж өгч байя, гэр орныг нь цэвэрлэж өгч байя, ер нь л үр бүтээлтэй ямар нэгэн зүйл хийж өгөөд явж байя гэж бодоод байгаа. Ажилдаа ороод завгүй болчихоод хэлж байсан үгээ мартах вий дээ,ккк.

Шинэ байранд орохоор тань архитекторчоор зургийг нь гаргуулаад нээээх сайхан тохижуулж өгнө гээд толгойдоо төсөөлөөд бодоод л байгаа. Гал тогооны шүүгээнүүд, хоолны ширээ, зочны өрөө, тавилга, унтлагын өрөөний тавилгууд, цонхны хөшиг,гэрлийн бүрхүүл,ханын обой, коридорын хэсгийн тохижилт, ванны өрөө гээд л.

Гэхдээ одоо хол байгаа болохоор та хэд боломжийн хэмжээгээрээ тохижуулчихаарай. Охин нь очоод өөрчлөх зүйл байвал өөрчлөөд янзлаад өгнө өө.

Ээжийгээ аваад төрсөн нутгаар нь очно гэж бодож байгаа. Би өөрөө ч гэсэн унасан газар Улаангомынхоо эмнэлгийн хашаанд очиж хөрвөөе дөө,ккк.

Охинд нь бодож төлөвлөж байгаа олон зүйл байгаа. Очиж байгаад ээжтэйгээ шавиагаа ханатал ярилцана даа. Охин нь тун удахгүй тан дээрээ яваад очно оо.

Миний ээж энх тунх байж, урт удаан насалж, үр хүүхэд бидэнтэйгээ олон олон жил хамт байгаарай даа.

Ижийдээ захиа биччихсэн болохоор таньдаа тэвэрч үнсүүлсэн гэж бодоод охин нь төрсөн өдрөөрөө баяртай сайхан байх болно оо.

Бага охин нь.